Dark Light

This Cantonese article is archived. Check out the original article.

Zimba 係一間專賣牙齒美白產品嘅網店。一開頭我覺得呢間公司相當有嫌疑,首先佢無實店,官網亦無提到辦公室/聯絡地址,而且亦只存在咗幾年,就咁表面睇,呢間公司有極大呃人嘅風險!之但係佢比起 Crest-a.k.a. 美白牙貼龍頭大佬(我簡稱C牌)嘅價錢真係平一截,所以唔洗諗好耐,我就抱住「我不入地獄誰入地獄」嘅精神買咗少少唔同嘅野睇下真老翻定真抵 deal!因為價錢相當吸引嘅關係,我嘅心態係如果嘅野無效,當自己唔好彩,始終平野通常都無好野,但如果真係有效,長期 keep 住買就真係慳好多!

超快簡介一下

Zimba 除咗主打嘅美白牙貼,佢地仲有幾款其他嘅產品,例如黑炭牙粉,防敏感潔白牙gel等等,主要目的都係美白牙齒。

Zimba 自家廣告,俾大家快快趣睇下有咩產品

買咗啲乜

我係喺2020年2月落單嘅,總共買咗幾下呢幾樣野(價錢單位全部美元):

  • Zimba LED 牙齒美白藍光燈套裝 ($34.99):包一個藍光燈儀器同一盒美白牙貼
  • Zimba 美白牙貼套裝 ($30) :兩盒美白牙貼
  • 旅行版牙齒美白筆 (2ml) ($7.99):買一送一

我再用咗當時嘅折扣碼減咗18蚊+俾咗4蚊運費,最後埋單$57.99,即大概$450蚊港紙。

LED 牙齒美白藍光燈

LED 藍光嘅原理係打開牙齒上面肉眼睇唔到嘅細孔,令到美白成份可以滲透得更深,同時加快美白效果。

Zimba LED 牙齒美白藍光燈

我落單嘅時候,Zimba 推出咗升級版嘅 LED 燈,有 32 個燈膽,比起原版嘅 16 個燈膽多咗一倍,聲稱輸出嘅能量同樣多一倍、美白效果更好。除咗燈膽數量唔同,新版仲係無線嘅,而舊版就要用 usb 線連住電源(電話/手提電腦)咁用,另一個重要嘅分別就係價錢,新版嘅價錢係原版嘅一倍有凸*

* 原版單獨發售價 29.99,新版無得就咁單獨買,要用套餐價,最低都要 74.99 先買到。

我自己本身係香港已經有一套牙齒美白藍光燈(韓國版子Dr. Smile) ,同 Zimba 嘅原版都係配 16 個燈膽,係操作上都非常相似(都係要 usb 叉住咁用),而我用 Dr. Smile 嘅效果已經幾滿意,所以最後決定都係買返 Zimba 原版 LED 燈。Zimba 原版嘅 LED 燈配有 3 個轉換頭(lightning/micro usb/type-c),基本上可以插入連上任何手提電話同電腦。

嚟加拿大嘅時候無帶到 Dr. Smile 過嚟,唯有再買多個(另一角度諗,來回加港唔使帶多舊嘢,哈哈哈…)

我自己好鍾意用緊美白牙貼嘅時候加埋 LED 燈用,成件事個效率提高晒!如果單獨就咁用美白牙貼,官方說明話最少要用 30 分鐘,如果連埋 LED 燈,時間就可以縮短到 10 分鐘。如果你嘅目的唔係想慳時間,而係想效果出啲,咁你亦可以安全咁連續行3轉,即總共用 30 分鐘。你亦可以隨便配合其他牌子嘅牙貼/凝露或美白筆咁用,真係好使好用!

如果你有牙齒敏感問題,千祈唔好死頂諗住捱得越耐越好!格硬黎傷到神經線,到時有手尾跟就得不償失㗎啦!

美白牙貼

呢個應該係本文嘅重點產品啦!我係呢次網購揀咗2款口味:椰子同南瓜香料,總共有3盒。每盒等於一個療程,總共有 28 個牙貼(各 14 條分別用係上、下排牙),需要連續用 14 日即 2 個禮拜。官方特別提到,每個月只能進行一次療程,所以用完一盒,至少都要等啲牙休息返2個禮拜先好再開始新嘅療程!

Zimba 美白牙貼

參考返上面嘅相,一邊嘅牙貼係短啲嘅,而短個排係用喺下排牙。理論上,你每次嘅使用時間為 30-60 分鐘,時間嘅長短取決於你牙齒嘅敏感程度、有幾多多餘嘅時間同想逹到嘅效果而調較,但即使你想白到好似假牙咁,一定唔可以貼過夜,因為其中嘅美白成份如果停留係牙齒太耐係會傷害到入面嘅組織嘅!雖然 Zimba 嘅牙貼成份本身已經顧及到敏感性牙齒嘅朋友,但官方強調牙貼絕對唔能夠貼過夜!

有唔少用後感都提到用咗一次牙貼之後會見到效果,我自己就覺得除非本身嘅牙黃到香蕉皮咁嘅色,如果唔係應該都幾難用完一次之後就見到白咗掛?我自己就係第 7 定第 8 次之後先開始見到啲牙白咗,但即使用晒成盒個效果都唔算好明顯,所以我完成咗一盒之後隔咗2個禮拜我又再做多次療程,用咗兩盒之後我就真係明顯見到啲牙白咗,效果都幾滿意!

過咗一年之後,我啲牙基本上都維持到效果,但我相信係因為我有用另一款美白牙齒嘅產品先維持到個效果。

我另外有用開嘅牙齒美白凝露

Plus White 5 minute Speed Whitening System 係一款我係 youtube 無意間睇到一個 youtuber 推介所以先識嘅牌子,我有時會用佢 + LED 燈。佢最大優點係平,最重要係有效,但佢最大嘅唔好處係要配合牙套用。

後記:我平日嘅護理仲有每晚沖牙,用嘅係 Waterpik 水牙線機,而我個款係附加咗美白牙齒功能嘅,詳情我係另一篇文有介紹。

美白筆

旅行版牙齒美白筆

呢款筆嘅定位係方便喺旅行時攜帶,而我好少用,亦只用過佢嚟做輔助。雖然我啲牙比未用牙貼之前已經白咗好多,但如果近睇,每隻牙嘅邊邊位仲係會有少少黃。

呢支筆使用方法好簡單,只需要扭一扭個筆頭,佢就會喳出美牙gel。驚喜嘅係,呢支美白筆嘅效果都幾快就見到,我直情搽咗上去無耐就見到啲漬開始變淡,根據使用說明,我敷咗5分鐘,效果非常唔錯!

雖然我用緊嘅時候無特別敏感嘅感覺,但如果5分鐘我已經見到效果,我相信佢嘅滲透力比美白牙貼高,但牙貼就夠溫和。

買定唔買?

試勻晒幾件產品,我覺得佢地都發揮到佢地應有嘅功能,就係美白!而且效果我幾滿意。喺用 Zimba 之前我都用過C牌嘅美白牙貼,但因為價錢唔平,用咗幾盒雖然都見到效果,但好難堅持長期用落去,而我有朋友買過佢嘅溫和版都依然覺得佢太刺激。我建議用唔到C牌嘅朋友可以試下 Zimba,因為我用落無覺得牙齒變敏感,同埋佢真係平過C牌一截!

所以結論係我覺得 Zimba 係值得一試嘅!

無贊助 呢篇文無收到任何贊助 (sosad),我澄清並•無•收•到•任何宣傳稿費或佣金,我係自費去買呢頁提及嘅產品/服務,係我自己嘅真實感受嚟。

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

You may also like...

我嘅香港➟加拿大移民經驗+攻略分享

作為練精學懶KOL,首先我要講明,呢編文嘅主要目的係俾我宣洩我嘅移民過程中遇到個On9廢到無論嘅移民顧問+究竟香港人有咩途徑移民加拿大,唔會同大家探討移民好定唔好、點解要移民加拿大唔係英國澳洲美國、移民要準備啲咩等等。

香港加油

作為一個土生土長嘅香港人,過去嘅幾年睇見香港因為政治搞到越嚟越差真係心悒,依家我雖然移咗民,但香港永遠係我屋企、鄉下、最美麗嘅地方!

Instant Pot Duo Crisp 二合一氣炸+壓力電飯煲

本來Instant Pot已經有唔少其他型號可以做到壓力煮食以外嘅功能,例如蒸、焗、乳酪等等,依家仲出埋氣炸功能,我覺得真係無得輸,一個煲已經做到晒大部份嘅煮食用途,想唔比個👍都唔得!