This Cantonese article is archived. Check out the original article.
好可惜4年前無做到1個詳細嘅紀錄，依家只可以盡可能靠記憶講返成件事，希望對一啲想做或者已經做緊隱適美／隱形牙箍嘅朋友仲有少少嘅參考作用啦！
利申返先，如果回憶內容有咩唔準我唔負責任㗎！內容及感受只供參考！
價錢
幾年前隱適美先係香港流行無耐，因為本身Invisalign呢個牌子都唔係成立咗好長嘅時間，隱適美幾乎係透明牙箍嘅代名詞，我當年去牙醫診所到問根本無另一個牌子有得揀，我亦好懷疑（PS 可惜我無證據）當年有冇其他牌子存在係香港市場！
可想而知，隱形牙箍呢個大賣點＋隱適美獨市＝貴到飛起。
我當年嘅價錢係HK$38,000（已包成個療程及微調＋ 3副原廠固定器），已經仲要係打左6折，仲要係因為有親戚係診所做有家屬價先平返啲。一般當年市面上要HK$30,000至HK$60,000不等，越平嘅當然越多人去，所以每次覆診嘅時間聽講至少要等1-2粒鐘，睇落好似平啲，但時間成本高，計落其實成件事真係一啲都唔平民。
更多隱形牙箍選擇
好消息係依家多咗幾個牌子（ClearCorrect），甚至可以唔經牙醫直接買家用版（例如加拿大呢邊有Smile Direct Club），有競爭令到價錢已經回落咗少少
雖然我唔太建議用，始終啲牙跟一世，如果中途出咗咩問題無人跟進或者負責任！
預計療程時間
頭先都講過，我係喺2016年開始整棚牙嘅，咁之後一年2017年年中就預定飛去加拿大working holiday，而牙醫同我設計嘅療程為期要2年，所以初初我係預計整到一半左右我就要喺加拿大完成埋最後嘅階段。而我總共預計要戴59對牙套。
差啲唔記得講，我個療程需要我用到attachment粒粒。
Attachment 粒粒
Invisalign SmartForce® Attachments
一啲同你嘅牙顏色一樣嘅粒粒用特殊嘅膠水痴係你牙齒表面，啲粒粒嘅作用係加強你嘅牙齒嘅移動力，達到牙箍要啲牙去嘅方向，原理就好似傳統鐡箍會用到嘅牙釘，都係俾個箍更力嘅力量去矯正你啲牙。
過程
我係箍牙目的主要嘅矯正我上排最前嘅2隻牙，因為好唔齊，睇落好似哨咗出嚟咁，我下排嘅牙表面係整齊嘅。
咁諗住下面唔使點搞應該成件事好快架姐，點知我嘅療程首先係需要將我下排牙往內推，令到上排嘅牙有空間收返入去，所以療程嘅上半部都係拉下排嘅牙為主，亦係成個療程最唔舒服嘅時間。
但過咗呢個階段就入直路，之後嘅療程簡直係易過食生菜，而且終於郁到我上面嘅牙，所以效果亦越嚟越明顯。
效果
最後我成個療程只係用咗1年多啲（計埋療程後微調），飛去加拿大之前啱啱開始用固定器，比預期要2年快。
咁我都要俾個叻自己嘅，本身我係一個幾自律嘅人，跟足牙醫指示，每個階段都戴足時間，亦記得到時到後就換箍，所以進度一直良好，咁當然棚牙都好爭氣，郁得夠快，我大概到第30對箍（療程要求戴59對），牙醫就同我講我個進度超乎理想所以可以飛箍再令個療程時間縮短。
第一階段療程完咗之後我覺得我上面嘅牙仲有改善嘅空間，所以我牙醫就為我設計咗額外11對嘅微調牙箍。
最終結果我係滿意嘅，我依家唔再因為上面嘅哨牙覺得尷尬，可以開口大笑啦?！（跳起Yeah！）
後遺症？！
唯一唔滿足嘅係，箍完牙之後出見咗牙縫黑三角，我牙醫話好多人矯正完之後都會有咁嘅問題，都算普遍，好消息係呢個問題係外觀問題，可以做牙齒醫美改善三角位，所以呢，又要使錢啦我！
咁過咗4年依家變成點？
根據我自己同朋友嘅經驗，最起碼每晚都戴固定器係關鍵！
我牙醫建議我頭3年都要戴固定器，而頭一年更希望我做到日夜都戴，就好似療程時咁。
我諗成個過程呢個階段我最唔聽話，因為我日頭無戴，只係夜晚訓覺先戴，好彩嘅係，我嘅效果依然保持到，而我真係足足晚晚戴咗3年固定器！
3年過咗，我有時懶就會唔戴1-2日，之後戴返我會發現個箍好緊，即係話其實3年後我啲牙都仲會郁！我有啲朋友箍完牙就算，無戴過／足固定器，結果唔夠1年啲牙已經走位，幾年過後啲牙變返最靚嘅效果7-8成，所以如果大家想一直靚落去，千祈唔好太懶！一定要用固定器呀！
回憶完
…但係為咗獎勵你咁有耐性睇晒成篇文，我精心為你再準備咗啲好有用嘅額外內容。想知我點保持口腔衛生同我點樣keep住我啲牙套同固定器無漬就請繼續睇落去啦！
