Dark Light

This Cantonese article is archived. Check out the original article.

話說一個人搬出嚟住,三餐嘅話自己煮,廚房應該都有一大堆唔同用途嘅煮食架生,最基本煲呀煎pan肯定唔少得,但煮耐咗就會心思思想入手更多,例如多士焗爐,因為有個焗爐真係方便好多!有時真係唔係錢嘅問題,而係當你發現廚房嘅空間越嚟越少、又或者要搬嘅時候,你就會諗點解當初買呢樣嗰樣…

為咗解決廚具電器越嚟越多呢個問題,我就諗好冇買個多功集一身嘅電器,然後將呢已經用舊晒或者真係好用但又好少用到嘅電器換咗佢,等廚房空間見洗啲呀嘛!有日無意中睇到氣炸爐嘅廣告,氣炸唔使用咁多油又可以當做焗爐唔錯喎!本來覺得又買多樣野,唉算啦…點知搵搵下資料就發現新大陸,乜原來依家壓力電飯煲都可以氣炸㗎咩?!

Instant Pot 點解咁出名?

Instant Pot呢個牌子係北美嚟講應該都數一數二,佢以壓力電飯煲起家,係市面上首個推出壓力煮熱電飯煲嘅公司,壓力電飯煲賣點係可以以較短時間就煮好飯餸(例如白飯唔計儲壓、放壓嘅時間只需3分鐘),而且因為係煮嘅過程唔會好似傳統蒸焗咁會大量流失水份,用壓力煲煮出嚟嘅肉真係特別滑同多汁!所以當年一推出已經成為好多家庭主婦嘅搶購目標。

本來Instant Pot已經有唔少其他型號可以做到壓力煮食以外嘅功能,例如蒸、焗、乳酪等等,依家仲出埋氣炸功能,我覺得真係無得輸,一個煲已經做到晒大部份嘅煮食用途,想唔比個?都唔得!係北美甚至有唔少家庭會擁有多過一個Instant Pot,一餐飯同時間用2-3個Instant Pot就可以好方便快捷咁煮好,係好多家庭主婦嘅廚房好幫手!

氣炸鍋蓋可以單獨買

如果你本身已經有Instant Pot,千祈唔好為咗嗰氣炸工能就走去買部新(住)!

Instant Pot另外仲提供單獨嘅氣炸鍋蓋配合部份適合嘅型號,功能同設定基本上同Duo Crisp無分別! 所以第一步應該係去睇下自己個pot配唔配到個氣炸鍋蓋先!

以我嘅資料分析,獨立版嘅氣炸鍋蓋同Duo Crisp本身嗰個最大嘅分別係單獨版要另外供電,即係個Pot本身一個插頭,氣炸鍋蓋又另外一個插頭。而獨立版嘅氣炸鍋蓋價錢大概1舊水加紙,價錢比得上一個完整版嘅Instant Pot…

拆解Instant Pot Duo Crisp全部用途同組成部份

11個煮食模式

  • 氣壓*
  • 煎/炒*
  • 慢煮
  • 蒸煮
  • 真空低溫烹調
  • 保溫*
  • 氣炸*
  • 烤煮
  • 焗煮
  • 炙烤*
  • 脫水

附帶組件

  • 壓力蓋
  • 氣炸鍋蓋
  • 炙烤盤架
  • 易潔涂層嘅籃
  • 籃嘅底架
  • Duo Crisp同不銹鋼內鍋
連盒附送嘅組件

使用感想

以上用星號 * 作標記嘅都係我已經用過而且幾熟嘅模式,我個人超鍾意最基本嘅氣壓同當然最新嘅氣炸功能啦!

氣壓功能真係無得頂,上面都有稍為提過下氣壓煮野食可以縮減煮食嘅時間,我感覺最明顯係用佢嚟煮雜糙米(黑米/紅米)全個過程由儲壓到放壓最快用咗大概40分鐘,而用傳統蒸嘅方法要用大概1個鐘,快咗成33%都幾明顯!另外一個賣點係氣壓嘅煮食原理可以幫助鎖住肉汁,我第一次用佢嚟煲湯真係有被驚喜到,未試過咁享受食啲湯渣!又以煮雞嚟講,傳統嘅蒸法較難做到全熟而又嫩滑,但用氣壓就兩者都輕易兼顧到,而且煮完嘅雞會變骨肉分離,拆骨完全無難度!

至於氣炸嘅效果亦有十個讚,只係需要用好少嘅油就可以做到好似油炸嘅脆僕僕口感同賣相。我聽過有大胃王投訴每次實際氣炸嘅分量(因為每次都要預留一定空間令高溫可以分散流通)其實唔多,我可能食量唔多所以無乜呢個煩惱,平時氣炸一個大概M記大薯條分量都無問題,如果要整2+人分量就可能真係要煩啲交開幾次氣炸。

至於佢個煎炒功能我就覺得麻麻地好用,一黎佢得2個設定(高/低),咁正常要快炒或快煎梗係要夠高溫,個低溫設定對我嚟講無乜存在價值,加上我set好時間佢都只係長期顯示ON,所以暫時我都唔知個時間設定係呢個模式有乜作用?。

其他功能我未用過就無得評論,但有聽過其他用家講慢煮個功能係Instant Pot一直做得差嘅模式所以我對佢都無乜特別期望或者有意欲用佢。我諗我下一個會試用嘅會係真空低溫烹調模式,聽講用呢個方法嚟煮牛扒非常正,可以做到入面每吋肉都保持一致嘅溫度,係屋企就可以整到出面大酒店嘅牛扒水準!

另外有人亦提出可以喺Duo Crisp做到無預設嘅乳酪功能,youtube上面已經可以搵到幾個相關係video,如果想自家製健康乳酪就要去睇下學吓師啦!我覺得Duo Crisp真係可以取代甚至超越半個廚房嘅電器,唔知有冇一日Instant Pot會出埋其他功能好似攪拌、發酵功能呢??

有乜無咁好

氣炸爐最常聽到嘅衰野係要洗好X煩,我暫時就未有呢個煩惱住,因為每次我用完個氣炸風扇蓋都會用濕布抹走啲油同污糟嘅地方,好彩到目前都未見到儲起油漬。

另外我見到有啲人會話個易潔涂層嘅籃好易甩漆,但我可能無好暴力咁去刷佢,到依家都無甩過漆,甚至我有時會用其他人叫千祈唔好用嘅PAM油噴都無事。

點解唔好用PAM牌油噴

因為佢入面有種物質會分解個涂層造成甩漆,而甩咗嘅漆層如果食咗落肚就大件事啦

不過有樣令我覺得解決唔到嘅問題就係用氣壓功能時個藝蓋入面嘅矽膠密封環(用黎鎖住同維持氣壓)煮完會吸咗食物嘅味道點洗都洗唔走,而由於佢係透明又係膠,用咗幾次已經有少少變黃,雖然佢吸味又會變黃,但又唔覺佢會影響之後煮嘅食物味道,所以問題又唔算大嘅。

黑人問號.jpg:究竟呢件野有幾抵deal

如果你睇完我介紹都有少少心動去買呢件電器,請你先保持克制,因為佢嘅零售價一啲都唔平民,8-qt size標價賣成加紙$249.99,另外如果你係小家庭,8-qt會夠你用,但對於單身人嚟講呢個size有點過大啦,至少我自己會覺得我無需要用到呢個size。

好彩,Walmart有獨家發售細少少嘅6-qt型號,售價為加紙$229.95,大部份時間都會低於呢個零售價,大概$168左右。對於窮L嘅我,呢個價錢係可以負擔亦都算合理嘅,但如果平啲梗係最好啦!

我等咗幾個月左右,係上年黑色星期五嘅時候終於都等到佢減到$128,所以我就決定入手!點知過咗一兩個禮拜,佢又再平咗…今次100蚊都唔洗, $98渣!精明嘅我當然即刻同客服申請退返個差價。你睇到呢到係咪以為告一段落?No!有人報料係某啲Walmart實店搵到清貨價半折,即係$49就買到全新嘅Duo Crisp!

只可以講,六合彩都有人中但永遠不是我…

結論:買定唔買?

用咗大概半年,我可以好放心同大家推介Duo Crisp,絕對值得入手!尤其是自己一個人住/小家庭,11合1咁強大嘅功能電器真係方便好用!呢部電器功能多多,幫我慳咗煮野要不停換廚具嘅唔方便,最重要嘅當然係佢有我想要嘅氣炸功能啦!不過我就建議大家等大時大節嘅時候先入手,因為打完折真係慳返唔少!

新型號注意

正呀喂

Instant Pot新出咗Duo Crisp嘅進階版叫Pro Crisp,目前係美國可以買到但加拿大呢邊仲未有大型嘅零售商引入呢個型號。呢個型號有幾個明顯嘅改良,包括內鍋加咗手柄(煎炒時可以固定唔會移來移去)、煎炒功能多咗更多設定、氣炸最高去到450°F等,仲有就係個外型型仔晒,變成全黑! 詳細介紹

無贊助 呢篇文無收到任何贊助 (sosad),我澄清並•無•收•到•任何宣傳稿費或佣金,我係自費去買呢頁提及嘅產品/服務,係我自己嘅真實感受嚟。

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

You may also like...

Zimba 牙齒美白系列:Crest 美白牙貼老翻?

Zimba 係一間專賣牙齒美白產品嘅網店。佢比起 Crest-a.k.a. 美白牙貼龍頭大佬嘅價錢平一截,我抱住「我不入地獄誰入地獄」嘅精神買咗少少唔同嘅野睇下 Zimba 係真老翻定真抵 deal!

我嘅香港➟加拿大移民經驗+攻略分享

作為練精學懶KOL,首先我要講明,呢編文嘅主要目的係俾我宣洩我嘅移民過程中遇到個On9廢到無論嘅移民顧問+究竟香港人有咩途徑移民加拿大,唔會同大家探討移民好定唔好、點解要移民加拿大唔係英國澳洲美國、移民要準備啲咩等等。